هالة صدقي: سبب رئيسي وراء نجاح مسلسل جعفر العمدة.. وهذه الفنانة كانت مرعوبة مني

أكدت الفنانة هالة صدقي أن نجاحها في تأدية دور صفصف بمسلسل جعفر العمدة، هو نجاح لكل "بنات جيلها".

ولفتت إلى أن هناك عدم اهتمام بهذا الجيل، ومحاولات لإنزالها "درجة ثانية"، ولم يحاولوا من قبل استغلال قدراته.

وتابعت خلال لقائها مع الإعلامية منى الشاذلي ببرنامج "معكم" الذي يذاع على قناة "cbc": "المشكلة اللي هواجهها بعد كدة، إن كل الأدوار اللي هتجيلي بعد كدة هتبقى صفصف، ولما نجح دوري في حسن أرابيسك، جالي أدوار بعدها نفس شخصية توحيدة في المسلسل، وأنا كنت برفض، أنا كنت خايفة على نجاح توحيدة، وصممت أبعد عن الشعبي".

واوضحت: "في تشابه كبير بيني وبين صفصف، أنا شعنونة، بس الناس بتفهمني غلط، أنا مش بعرف أزوق الكلام، والقريبين مني أوي فاهمين ده أوي، اللي عارفني فاهم ده، واللي مش عارفني كويس هيتخض".

ولفتت هالة صدقي، إلى إن السبب الرئيسي في نجاح مسلسل جعفر العمدة، يرجع إلى مخرج وكاتب العمل محمد سامي.

وردا على سؤال حول كيفية حصولها على دور "صفصف"، قالت: محمد سامي كلمني في الصيف، وقالي يا هالة أنا قاعد بفكر في شخصية ومش شايف حد فيها غيرك أنتي، قالي هو دور لواحدة ست أم لاتنين كبار في السن، قولتله أنا مش عندي مشكلة قبل كدة، وممكن نعمل ده بالميكب والإضاءة، رديت على محمد سامي قولتله أنا موافقة يلا نشتغل".

وبينت: "الإضاءة لعبت دور مهم جدا في تغيير ملامح صفصف، كان في ضبط بين الميكب والإضاءة، علشان منحسش أنه ميكب بجد، هو تأكيد على الملامح والخطوط اللي في الوش".

وأردفت: "وأنا بقرأ الاسكريبت كنت حاسة إن الدور مش هو اللي أنا عاوزاه، اللي مكتوب على الورق حاجة، والتنفيذ حاجة، سألني محمد سامي، بتثقي فيا ولا لا، قولتله بثق فيك، هو عنده بعد نظر، وكان طول التصوير يقولي أنتي مش عارفة صفصف دي هتعمل إيه مع الناس".

وقالت: لو رجع بيا الزمن 20 سنة لورا هختار دور وداد لأنه دور عظيم وفيه طلوع ونزول وفي تمثيل ده أكتر دور عجبني في المسلسل.

ومضت قائلة: كان هناك غيرة بسيطة بين البطلات ولكن كان هناك حالة حب تجمعهن في الكواليس.

وزادت: أنا كنت صاحبتهم وكنا بنتواصل سوا ولازلنا على تواصل والكلام دا بيتحس على الشاشة.

وكشفت هالة صدقي عن المشاهد التي جمعتها بالفنانة إيمان العاصي وقالت: إيمان كانت بتتخض مني في المشاهد اللي جمعتنا لما كنت بشتمها علشان مكنتش تعرفني في الأول ولما اتصاحبنا مبقتش خايفة مني وجوري بكر كانت خايفة مني.